政情:新東補選 公記難撐龐愛蘭

立法會新界東議席補選引起唔少黨派覬覦,三年前立法會選舉時大熱倒灶嘅沙田區議員龐愛蘭(Scarlett)都話積極考慮參加補選。Scarlett話,經過立法會政改方案投票「甩轆」事件後,好多街坊都話立法會好多「垃圾」議員,就鼓勵佢去補選,莫非街坊希望佢踩住班垃圾議員上位?

不過,新民黨早已表態唔會派人參選,而去年公民力量(公記)與該黨結盟時,雖然身為公記成員嘅Scarlett冇選擇入黨,但亦冇離開公記,若佢執意參選,到時公記好大機會唔方便出面撐佢,唔通Scarlett要退出公記或轉用新論壇身份參選?Scarlett就話,依家仲未諗到咁細微,當務之急都係做好嚟緊十一月嘅區議會選舉工作先。佢話,公記早前開會時曾問佢會否參選,但佢暫未有明確回覆。

我哋問過身兼公記及新民黨成員嘅沙田區議會主席何厚祥,佢話暫時未聽到Scarlett考慮參選嘅消息。

第一手消息請下載on.cc東網iPhone/iPad/Android/Windows Phone Apps