政情：蔣麗芸抽錯火水急拋波
政改「甩轆」後，相信大家都估唔到，建制派喺首單搞到滿城風雨嘅民生議題「鉛水風波」中一樣甩轆。事關出事嘅啟晴邨位於九龍西，屬於民建聯立法會議員蔣麗芸（阿Ann）嘅選區，照計阿Ann應該如獲至寶，藉機大抽水。點知佢丈夫梁海明係涉事屋邨總承建商母公司中國建築國際集團獨立非執行董事，阿Ann若插手件事，隨時被質疑有利益衝突。
民記怕件事焦點被模糊，所以尋日急急幫阿Ann將個波拋出去，轉手畀該黨黨主席李慧琼接手。跟住又急起直追做騷，一方面約見房屋署署長，另一方面主動出擊，聲稱要驗足五十個屋邨食水咁話。
教授出埠 累民協失頭啖湯
突如其來嘅「鉛水風波」，唔止民記諗盡辦法抽水，各政黨又點會輕易放過？數最唔抵嘅莫過於民協，因為佢哋早喺二月份就收到有人提供啟晴邨水龍頭含致癌重金屬嘅消息，民協謹慎起見，搵咗一名大學教授做化驗，六月有結果。點知嗰位教授跟住出咗埠，七月中先返，結果等唔切民協揭開真相，已經被人飲咗頭啖湯，白白浪費咗一次攞彩嘅機會，認真失威。
不過「後知後覺」點都好過「不知不覺」。一直瞓緊覺嘅公民黨尋日先識得落區派水畀居民，果然貫徹該區議員毛孟靜勁離地嘅特質。但係最離譜係西九新動力「抽錯水」，前日仲走咗去出現死魚嘅啟德碼頭抽水，尋日先識得搵人開記者會補飛，真係輸得好難睇。
一舊雲周圍驗 威番一次
睇番各政黨措手不及嘅反應，今次率先踢爆事件嘅民主黨黃碧雲應該會偷笑。佢當初加入議會時發生投錯票笑話，所以被改花名叫「一舊雲」，今次「鉛水風波」終於可以威番次。佢話自己負責食物安全議題，經常都會抽嘢驗，當佢獲悉政府驗水冇驗重金屬，此後喺九龍西周圍「抽水」化驗，結果畀佢扑錘成功。佢近日仲日日落區及開記者會逼政府回應，真係乜水都畀佢抽乾喇！