政情：楊立門新工從事即時傳譯
去年六月底退休嘅民政事務局前常任秘書長楊立門（Raymond）八足咁多爪，早前一如「政務官歌王」嘅外號，開始認真發展歌唱興趣，一手包辦新歌嘅演唱、作曲同作詞部分；及至最近Raymond又有新發展，據公務員事務局最新登記冊顯示，Raymond於本月一日起受聘於Polyglot Translations，提供兩文三語即時傳譯服務。
部頭形式 拒透露薪酬
其實Raymond於上月初出席音樂會擔任友情客串嘉賓時，已率先預告政府批准咗佢本月起可以做受薪工作，原來呢個就係佢駕輕就熟嘅即時傳譯工作。Raymond接受查詢時話，自己係以部頭形式參與即時傳譯工作，不過佢以商業因素為由，不便透露離開「熱廚房」後嘅首份工作同涉及回報金額。據知目前市場即時傳譯時薪係二、三千元開始起跳，似乎好似Raymond呢啲精通兩文三語嘅前政務官，於即時傳譯工作業界定必相當搶手同吃香。