中環出更：曾鈺成被轟歧視非洲人
立法會主席曾鈺成最近因為建制派喺手機程式WhatsApp群組對話內容曝光，被質疑主持會議唔獨立公正，點知日前又爆出佢三年前喺立法會辦公室疑被竊聽。不過，曾鈺成仍然是非停不了，尋日有網媒報道，話佢去年十一月、佔領行動期間出席香港大學一個私人活動期間發表咗一啲涉及種族歧視嘅言論，真係一波未平一波又起。
自稱講笑 呻被錄音
話說曾鈺成出席港大一個私人活動時就引述佢嘅醫生同學，教佢若要將佔領者趕離金鐘佔領區，方法就係將尖沙咀重慶大廈內嘅非洲人帶到金鐘，話畀佢哋聽嗰度有帳篷瞓覺，而且免費有三餐供應。曾鈺成當時已經強調只係講笑o架喇，但點知又被人翻舊帳。曾鈺成尋日再次重申，有關言論並冇歧視成分，又呻私人活動唔應該錄音喎。
另外，尋日立法會議員陳志全（慢必）就建制派WhatsApp群組事件喺內務委員會提出，由內會喺下周三大會對曾鈺成提不信任動議。慢必就話估唔到電影《少林足球》嘅劇情可以喺立法會出現，批評曾鈺成係球證、主持，又係建制派軍師。不過，一眾建制派群起護航否決動議，但工聯會王國興就以「農夫與蛇」寓言作比喻，話曾鈺成一直偏袒泛民主派，先搞到依家被毒蛇反咬喎。
卓妮