中環出更：潤澤塵爆傷者 媽打力撐
台灣新北市八仙樂園粉塵爆炸慘劇，不幸有港人受傷，香港灼傷互助會副主席張潤衡，近日飛往當地慰問傷者，卻換來網民批評佢嘅樣貌對傷者會有心理影響。民政事務局前常任秘書長李麗娟（媽打）與食物及衞生局局長高永文，均開腔力撐契仔潤衡做得啱。高永文話：「外表是美是醜唔重要，最緊要係內心美善。」
為飛台灣，潤衡被迫甩底，未能出席前日媽打及八仙嶺山火另一倖存者蘇婉珊（Wendy）嘅生日派對。不過，潤衡太太Rainbow就代丈夫帶埋兩歲多嘅囝囝一齊出席。見社交網站有人留言批評潤衡，Rainbow大表無奈，話百分百支持丈夫。
契爺高永文：心善則美
撐潤衡嘅，仲有契爺高永文，佢話：「一個人嘅外貌是否嚇人，各人有唔同睇法，但只要人有一顆善良的心，自然靚。」好似媽打咁，生日不忘行善，將今年收到合共十萬元賀禮捐予慈善團體，自己再加碼捐多十萬元。
曾同潤衡一齊捱過治療嘅Wendy，佩服戰友夠勇氣。佢認為以疤痕纍纍嘅面孔去探訪，並不嚇人，而以過來人經歷安慰患者，的確較有共鳴。好似佢當年燒傷後，經歷六年反覆治療同手術，傷痛不足為外人道。如今Wendy喺貿易公司擔任行政工作，又開網店賣韓國化妝品，故勉勵事件中嘅傷者：「火災過後只要唔放棄，生命一樣可以改變。」
卓妮