中環出更：遊行人數少 民陣死撐話局勢明朗
民陣與多個民間團體之前發起「全民拒絕假普選遊行」，大會話高峰時期大約有三千五百人參加遊行，遠遠少過民陣當初預期嘅五萬人。民陣召集人陳倩瑩就解釋話，咁唔代表少咗人支持，反而係因為現時局勢明朗咗，市民相信政改方案會被否決，所以認為毋須上街抗爭喎。
市民或對活動冇興趣
按佢咁嘅理解，政改方案表決當日，反對政改者都毋須組織支持者去立法會集會，大家喺屋企抖涼仲好喇！
講真嗰句，遊行人數比預期少咗咁多，民陣應該擔心係咪少咗市民支持否決方案，甚至要自我檢討吓，市民係咪對民陣號召嘅活動冇晒興趣，而唔係得把口死撐。
講到政改表決日嘅集會，立法會附近就一定唔會「零集會」喇！因為同場嘅保普選反暴力大聯盟發言人陳勇話，無預計政改方案可唔可以通過，但聯盟會喺周三及周四到立法會大樓外舉行撐政改集會，預計會有幾千人參加。
佢就重申調查反映民意支持政改方案通過，期望二○一七年，就可以一人一票普選特首喎。
卓妮