中環出更:獻唱籌款周永健歌神上身

馬主協會慈善基金早前舉行籌款晚宴,城中馬主齊出動,多位馬會大董亦粉墨登場,為慈善而唱。壓軸獻唱嘅馬會副主席周永健拎起支咪唱《Only You》時,即時如歌神上身,仲由台上唱到台下,大搞氣氛叫善長捐多啲。佢笑言賽馬日好恨贏馬,呢晚就好恨大家加碼咁話。

史立德英文冧歌送太太

為善款,大董們瞓身去到盡。有把磁性靚聲嘅大董葉澍堃都開金口獻唱,佢揀咗首《為你鍾情》,甚有唱家班水準。大董陳南祿就全程拎起結他喺台上伴奏。

好唱得嘅晚宴籌委會主席史立德梗係要獻技,佢帶頭高歌一曲《Wonderful Night》,更點名將首歌送畀太太史顏景蓮,冧爆嘅表現獲得全場掌聲。

林建康爆愛駒常「甩鞋」

一眾馬主聚首一堂,唔少得分享吓養馬趣事。愛沙尼亞駐港名譽領事林建康(Matthew)大爆愛駒「勇敢福星」經常「甩鞋」,事關匹馬天生腳形特別啲,每次着上馬蹄鐵奔馳時,總係飛甩舊鐵。為免愛駒「甩鞋」跑到腳痛,Matthew同練馬師最後找來一位師傅,為愛駒度身訂造馬蹄鐵,自此馬匹跑得又快又爽,安樂晒。

最令馬主遺憾,莫過於錯過拉頭馬。東華三院副主席王賢誌話,幾乎每次愛駒出賽都會捧場,點知有次因為塞車,遲咗十幾分鐘入場,偏偏匹馬喺頭場爆冷跑出,白白錯過拉頭馬,諗起都揼心口。

卓妮

第一手消息請下載on.cc東網iPhone/iPad/Android/Windows Phone Apps