政情：民記老區將唔吼瘦雞餐
我哋早前講過民建聯（民記）針對東區同屯門兩大老區推出政黨肥雞餐，以未來四年月薪一萬元嘅地區支部顧問，「低薪」利誘資深區議員退休交棒畀年輕人。不過，銀彈政策不但被譏諷為「瘦雞餐」，推出至今依然反應冷淡，預料蔡素玉、陳雲生等到達退休年齡嘅老將會力爭連任，第二、三梯隊睇怕都要坐多四年冷板櫈。
據知民記為銳意搞年輕、專業化，早年曾硬性規定年過六十五歲嘅資深區議員退下火線，但唔少仲行得走得嘅老將都趕唔切揀蟀，甚至根本無意培育新人，強行一刀切交棒變相將議席拱手送畀對家，因此民記早已將有關規定延至七十歲，而且唔再硬性推行。該黨眼見地區議員老化，所謂嘅「肥雞餐」應運而生，可惜一啲都唔肥。
福建幫愈老愈受歡迎
以民記議席嚴重老化嘅東區為例，民記今屆十四席除咗委任嘅楊位醒預告唔尋求直選，以及維園區議員周潔冰被「鎅」到灣仔區之外，至今只有許嘉灝及勞鍱珍有意交棒，而黃建彬、蔡素玉等高齡議員聽聞都無意退下火線。有人分析東區以福建幫為首，同銳意年輕化嘅民記文化唔同，愈老愈受歡迎，瘦雞餐自然唔吸引亦冇人吼。
陳雲生寸新人「有個性」
另一老區屯門亦有同樣情況，聽聞該區轉食瘦雞餐嘅人係零，我哋問過該區地膽陳雲生，佢先係話現階段仲未決定，但就坦言新生代「好有個性」，好似落區工作要求有黨內高層傍住，選舉心態同上一代好唔同，要搵人接棒實在有困難；再者瘦雞餐每月一萬元，只係相當於保安員，對比區議員份糧實在唔夠吸引囉！
其實該黨老將唔肯交棒都有原因，事關佢哋喺地區工作多年，累積一定支持度，就連泛民主派都唔敢貿然派人挑戰，間接為呢批老將創造咗「不敗神話」，無人挑戰自然不斷自動連任，咁點解仲要交棒呢？再者，區議員每月近三萬元月薪袋袋平安，相對四年月薪一萬元嘅地區支部顧問費，都唔使點考慮啦，所以民記想班老將交棒，睇嚟筆顧問費都要加碼喇。