政情：政改倘否決 議員料股災

張華峰指藍籌或勁挫

縱橫金融界多年嘅立法會金融服務界議員張華峰（肥老闆）話，預計政改方案被否決當日，港股一定會跌唔少，尤其係重磅藍籌股更加會大幅下挫，因為政治局勢唔穩定，點都會影響股市。不過，肥老闆教路，話政治因素只會有陣痛，跌勢最多持續三日，所以有信心又有能力之人，可考慮喺低位撈貨。

咁到時入咩貨好呢？肥老闆話，應該揀啲較容易反彈嘅藍籌股，當中首推港交所（388）。嘩，又係港交所，肥老闆會唔會悶啲呀？點知佢話唔會呃大家，因為要有人想拋貨求售，都要有人承接至可以成交，即係話股市無論升定跌，港交所都唔愁無生意做。咁咩價位入好？佢話港交所跌返去低位已經無乜可能，建議大家可以等到二百八十零蚊水平，就可以小注怡情玩幾手喎。

陳倡手執現金策略

至於另一位有「立法會股神」稱號嘅保險界議員陳健波，雖然都係睇淡政改會跌市，但佢就無肥老闆咁樂觀。陳健波話政改方案一旦否決，即係意味香港未來都會處於動盪時代，而股市係最易受到政局影響，預計港股有可能全面下挫，最少要幾星期至可以平穩番局勢，所以近期佢都無乜貨在手，主張「Cash is king」手執現金嘅策略。

雖然兩大立法會股神都話政改方案否決會令股市下挫，但投資涉及風險，大家都係因應本身情況作出投資決定，事關股市跌起上嚟，幾時見底實在好難講，所以肥老闆話小注怡情就係咁解喇。