眼高手低已成為香港官場嘅風土病，講就天下無敵，做就無能為力，好多所謂嘅宏圖大計，唔係無疾而終，就係虎頭蛇尾，連興建行人天橋咁簡單嘅事都搞到唔湯唔水，怨聲載道，唔到你唔服。
係人都知，香港空間有限，人多車多，行人天橋係重要嘅社區離地網絡，除咗可以紓緩人車爭路問題，亦可以方便殘疾人士出行。弊在當局齋噏當秘笈，好多規劃多年嘅行人天橋，到依家仲係紙上談兵，興建無期。
好似將軍澳連接尚德邨同港鐵站嘅行人天橋咁，○二年港鐵通車時已計劃興建，○七年更被納入土木工程署嘅工程計劃，前期設計工作早已完成，原定○九年竣工，點知拖到今時今日仲「覆檢中」，唔知幾時至開工。拖拖拉拉之下，成本自然節節上升，造價從當初估計嘅五千四百萬元飆升一倍到一億一千萬元，你話納稅人係咪冤枉吖！
另一個例子係港鐵沙田站連接沙田政府合署嘅行人天橋，亦係無影無蹤。同尚德邨天橋一樣，當局早喺○二年已經計劃興建呢條天橋，當時大多數市民都支持，只因附近村民指天橋太近村屋同埋要斬樹而強烈反對，而政府又企硬唔肯改道，雙方僵持不下，不了了之。
最搞笑嘅係，有啲天橋無影無蹤，有啲天橋就貨不對辦。荃灣海濱區本來計劃興建一條十五米長嘅行人天橋，連接一個新樓盤同荃灣西站，連駁口都預留咗，位置亦定埋，點知早前當局突然以人流不足為由推倒原計劃，可以遮風擋雨嘅行人天橋，結果變成無遮無掩嘅過路處。
有立法會議員就講得啱嘞，興建行人天橋問題多多，烏龍百出，皆因當局規劃失誤，既冇周詳計劃，又冇同各方面好好溝通，一遇到困難或反對聲音就縮沙，唔係拖得就拖，就係索性擱置，白白浪費時間及公帑。
話時話，港產官僚無能，做嘢求求其其，工程延誤及超支嘅例子多不勝數，行人天橋只不過係冰山一角咋。淨係高鐵就超支二百幾億元，加上其餘大型工程更係天文數字。好似計劃咗幾年嘅蓮塘口岸咁，工程一再延誤，造價一再上升，由○七年估計八十億元增至現時超過三百五十億元，升幅超過三倍。之所以搞成咁，反對派政客阻頭阻勢固然係其中一個原因，而地質問題增加施工難度亦係另一個原因，但講到底，始終都係港府責任最大，如果當初做好規劃，及時發現問題，又點會花咁多冤枉錢吖！
所以話，港產官僚大事做唔到，小事做唔好，連行人天橋都搞到一鑊泡，正一係倒米壽星！