中環出更：立會開會 潮「偉」着短褲
天氣轉熱，無論男女都鍾意「短打」上陣，但立法會議員梁國雄（長毛）去年夏天就因為着短褲出席大會，而被主席曾鈺成裁定唔莊重，焗住換番條牛仔褲先可以繼續開會。不過，卓妮尋日撞到着短褲仔嘅謝偉俊（Paul）現身立法會，見佢一身迷彩短褲襯帆船鞋，相當型佬，但唔怕又畀委員會主席「裁決」咩？
周六「偷雞」 周三淆底
Paul笑言，佢呢身造型對比長毛，fashion（潮流）味比較濃，仲潮流教父上身話，今年潮興西裝襯迷彩短褲，佢好鍾意咁着，唔怪得同長毛比較係唔同味道。Paul仲透露，之前已經試過趁星期六開會，靜靜雞着兩、三次短褲開會，好彩冇被委員會主席當場捕獲，亦冇議員投訴，但就話唔敢着去開星期三大會喇。
除咗長毛同Paul，其實着短褲進出會議廳嘅仲有范國威（Gary），去年佢因為撐「短褲」長毛而專登換番條短打出席大會，但就冇再被人投訴，唔通真係着得型就代表莊重？
卓妮