今年係六四事件二十六周年，但隨着本土派崛起，批評支聯會年年搞六四晚會只係行禮如儀兼唱Ｋ，熱血公民更揚言會另起爐灶，落齊十八區搞晚會；加上學聯早前以院校未達成共識為由，宣布唔參與六四晚會，係二十六年來首次。支聯會面對內憂外患，真係屋漏兼逢夜雨。
唔知係咪因為咁，支聯會新任主席何俊仁（AV仁）尋日公布月底大遊行及六四晚會詳情時話，支聯會今年會特別出版小冊子，回應本土派同年輕一輩對六四晚會嘅質疑。AV仁仲話，六四晚會彰顯重要嘅核心價值，係一場利用群眾力量嘅「本土運動」喎！唔通佢想重新包裝晚會，以求吸客？
至於學聯今年將缺席晚會，分分鐘冇年輕代表上台發言。AV仁就話，佢哋已經發帖廣邀所有大專院校嘅學生會參與，已有至少三間院校答應出席，只有港大學生會表明缺席，相信屆時都會有學生代表嘅。