華富邨商場「門檻」高 輪椅客購物難

「對上一次上三樓已經係好耐之前，嗰陣仲用緊普通輪椅，係大仔抱我上去，兩個細仔負責搬張輪椅先搞得掂，自從佢哋移咗民同搬走咗，我就冇上過去！」黃女士需以輪椅代步，指華富（一）邨商場依山而建，惟一直不設升降機，一樓街市及二樓平台毗鄰行人路，現使用電動輪椅的黃尚可經邨內斜路到達，但往三樓則比登天更難，「三樓有快餐店同家品店，但我咁多年都冇份幫襯，本身坐輪椅已經唔去得遠，點知連自己喺屋企附近食下嘢都唔得！」

推諉地理環境限制

黃又指街市及商場商店門口皆設有一級「門檻」，平日無法進入店內選購貨品，只可靠店員代勞，「要事先諗好晒買咩，然後叫職員執畀我，佢畀啲咩我就要買咩，冇得自己揀！」

現時僅設自動扶手電梯連接商場平台及三樓，一旦停用居民便需撐樓梯。	瀑布灣道地勢陡峭，手動輪椅使用者上、落斜皆有危機。	柴文瀚

房署發言人表示，華富（一）邨現約有九百七十個全長者戶，並有十九人登記為輪椅使用者。發言人續稱，曾就商場增設升降機連接上層及街市一事作初步研究，惟礙於地理環境所限，加上部分街市及商戶舖位需在施工期間封閉，對居民及商戶均造成不便，故現時未有相關計劃，輪椅使用者可透過瀑布灣道斜路進入街市，員工會盡可能提供協助。

街坊心聲 鄭婆婆：「有升降機好好多，條自動扶手電梯又窄，有時又壞，多部升降機就唔怕撐樓梯！」

麥婆婆：「條斜路（瀑布灣道）路面好多凹凹凸凸位，就算坐電動輪椅都好易拋出去。」

不過，黃女士卻直指房署的建議難以全面照顧所有輪椅使用者需要，「瀑布灣道係山路，普通輪椅如果冇人推，上、落斜都好易反車，同埋嗰個入口好多貨車出入，好容易出事！」黃女士指用電動輪椅後亦無法在房署職員協助下進入商場三樓，「淨係部電動輪椅都成百幾二百磅重，連埋我坐喺度，你叫啲職員點幫到我抬上去？」

倡建斜台或升降台

「華富本身已經係老人邨，愈嚟愈多住戶要坐輪椅，商場冇升降機真係好唔方便！」當區區議員柴文瀚批評房署多年來以不同理由否決在商場加設升降機的可行性，卻未提供其他可行方法改善場內無障礙設施，變相剝奪傷健人士出入公共空間的權利，「就算依家未加到升降機，都可以諗下會唔會加斜台同輪椅升降台，需要嘅錢都唔會話太多。」

記者：呂耀焜