近年香港興起成立地方省市社團總會或組織，表面上話係聯絡鄉情，查實同有關方面為咗喺香港嘅選舉中發揮組織動員力不無關係。
不過，香港有頭有臉嘅政商界人士數來數去得嗰幾個，要搵到啱心水嘅當地籍貫人士揸旗，一啲都唔容易。好似最近捲入將中學生撐政改影片擺上網，而被有關學校告侵犯私隱風波嘅廣西社團總會，其會長鄧清河及一眾高層都唔係廣西人，真係幾搞笑。
不過，呢個情況唔係廣西社團總會獨有，其他總會都有類似情況，事關呢類總會一向炒雜燴，只要同當地有些少淵源嘅人，例如當地政協委員及喺當地投資嘅外商，都可以加入，而且唔少總會鍾意搵猛人掛榮譽頭銜，導致來來去去都係幾張眾人熟悉嘅面孔。
其實，廣西社團總會名譽會長就有唔少廣東人，當中包括廣東社團總會前主席王國強及立法會議員林健鋒，唔通有個「廣」就得？講到尾，其實都係一場畀面派對啫！