政情：政助銷政改 化身送禮「鵬」
政府高官早前連日落區宣傳又簽名撐政改後，政制及內地事務局尋日再「出招」送大禮，趁立法會續會派出政治助理陳岳鵬（Ronald）向議員、傳媒大派政改宣傳品，例如寫有「2017一定要得」嘅Ｕ形手機托、前年政改第一階段諮詢用嘅原子筆。
Ronald話，Ｕ形手機托寓意撐住手機之餘「撐住政改」，一款多色，反映政府「撐住」社會各階層添，佢仲即場示範點樣「托」起政改。除咗手機托，Ronald仲四處向記者大派政改紀念筆，但筆身寫住「有商有量，實現普選」標語，係前年政改諮詢口號。Ronald解釋，佢係應記者大讚支筆好用，先攞一袋派畀大家啫。