中環出更:街市洗地 誤傳高官落區

近日高官頻頻「打游擊」落區宣傳政改,搞到地區人士入晒腦,杯弓蛇影。話說尋日網上有傳高官會到石硤尾南山邨街市派發政改宣傳單張,由於早前特首都有去過街市接觸市民,令唔少傳媒同示威者都大為緊張,點知最後發現原來係流料。原來高官落區消息源自南山邨街市商販,以訛傳訛搞出個誤會。

網上消息話,有房屋署職員通知南山邨街市商販,叫佢地收拾好走廊物品及洗太平地,仲話會有官員喺尋日上午九時至下午五時落去巡視添。一大班傳媒收到消息之後蜂擁而至,更加有示威者帶埋標語在場守候。不過,問過街市商販,佢哋話高官落區消息只係以訛傳訛,大家都唔係咁清楚,但個個都乖乖認真洗太平地。

實情係部門巡視衞生

民協副主席譚國僑話,今次其實係個美麗誤會,佢話房署一早叫街市檔販執嘢,係因為今日有其他部門去街市睇衞生及審核檔位使用情況,點知市民就因為咁傳吓傳吓話有高官落區。佢仲話,尋日問過房署同警民關係科,都冇人就落區作出回應,即係流料啦!

卓妮

第一手消息請下載on.cc東網iPhone/iPad/Android/Windows Phone Apps