中環出更:高錕夫婦鶼鰈情深成典範

信守一生承諾嘅愛情,最值得歌頌。一個美鑽品牌舉行「牽手.承諾」主題展,以「光纖之父」諾貝爾得主高錕及其夫人高黃美芸對彼此無私奉獻嘅愛情故事為主題,廣邀中學生進行藝術創作。高太尋日出席獲獎作品展覽開幕時話,高錕發病至今已十三年,仍然識行、識走、識笑,佢已好滿足。

高太話,今年係佢同高錕結婚五十六周年,數十年婚姻生活一直十分精彩,即使高錕患上腦退化症,佢仍會堅守承諾,好好照顧丈夫。佢話,一般腦退化症病人發病後最多只可存活八至十二年,但高錕發病至今已十三年,情況仍然唔錯。

高錕現時每天堅持運動,步行半小時。咁精靈,秘訣離唔開家人嘅愛心及照料,身為照顧者必會感受到壓力,唔知高太點樣減壓呢?高太話,感到壓力大嘅時候便會「行開一陣」,外出走走。

有愛無懼頑疾

該項校際藝術活動由國際成就計劃香港部(JA)主辦,JA主席盧永仁話,佢都係高錕慈善基金會董事,同高錕係相識廿幾年嘅朋友。雖然腦退化症已經係全世界第三大疾病,僅次於癌症及心臟病,而且冇得醫,但佢堅信只要有愛,就唔使怕。

今次共獲八間中學派出十四個團隊參加,當中四個優異作品將於明日起喺天際100香港觀景台展出三日,藉此提高大眾對腦退化症嘅關注,同時為高錕慈善基金籌款。

卓妮

第一手消息請下載on.cc東網iPhone/iPad/Android/Windows Phone Apps