「貪曾」前特首曾蔭權爵士連串「貪盡海陸空、歎盡省港澳」嘅貪腐行為，已被廉政公署調查超過三年仍未有檢控決定，令市民感覺廉署以至律政司是否刻意拖延。廉政專員白韞六尋日仍然唔肯評論案件，只係好隱晦話：「有啲證據搜集過程，因為（案中人物）本身嘅行為神秘，我哋需要多啲時間」喎。講到「行為神秘」，貪曾真係中晒，事關佢出出入入都相當鬼祟，而且遮遮掩掩，好似唔見得光咁，唔知白韞六係咪講緊貪曾呢？
