政情：建制內訌嗌換班長
立法會四十多位建制派議員，表面睇起來好團結，但其實山頭主義好嚴重，各黨派都各懷鬼胎，一直隱藏唔少內部矛盾。例如建制派負責對內聯絡大小政團、協調日常議會運作嘅「建制派班長」一職，過去多年一直係民建聯（民記）葉國謙把持，但隨住佢有機會進身行政會議，最近就有聲音要求佢退位讓賢，唔好仲霸住個班長位喎。
令工務及人事小組失守
建制派出晒名叫做「投票機器」，但機器都要人控制，為免班建制派議員喺緊張時刻投錯票，葉國謙呢個班長好多時都擔任指揮員角色，例如要大家投贊成票，佢就會拇指向上，相反則向下。過去幾年，佢都好享受做班長呢個角色，十足「揸住雞毛當令箭」，好多建制派新丁議員都聽佢支笛，曝光率又高。
不過，隨住李慧琼（Starry）出任民記主席，按不成文規矩需要辭去行政會議成員一職，而政圈就盛傳葉國謙會頂替Starry入行會，所以建制派覺得佢再做班長似乎唔係咁適合。其實話佢入行會嘅原因只係導火線，歸根究柢係佢做班長唔稱職，甩甩漏漏。遠嘅唔講，最「大罪」係去年冇做好協調工作，以致工務及人事編制兩個小組委員會「失守」，被泛民主派攻陷取得話事權，就工程及開設職位「拉布」已拉足超過半年，真係多得佢唔少。
李慧琼升呢被批唔識撈
雖然建制派對葉國謙不滿之聲浮現，但民記仍然戀棧班長之位，仲想撐唔再係行會成員嘅Starry接任班長一職。不過，建制派有人就批評Starry做咗黨主席後，都未見佢有廣邀一眾建制派議員食飯，招呼都唔打個，似乎唔係咁識撈囉！
有建制中人話，其實班長呢個位冇講過一定係民記「世襲」，大把資深議員有資格出任，例如內務委員會主席梁君彥或人緣幾好嘅工聯會黃國健，都係可靠人選。睇嚟今次爭拗，可能又要有關方面出手協調，否則建制派內鬥惡化，只會令泛民漁人得利。