政情：羅范落區銷政改 小童彈開
一班港區全國人大代表尋日拉隊落區推銷政改，仲好識揀去咗建制派主場嘅北角擺全日街站，點知一樣中招。好似身兼行政會議成員嘅港區人大羅范椒芬，到港鐵北角站外派政改宣傳單張時，雖然好受上咗年紀嘅街坊歡迎，但後生仔反應就麻麻，有小朋友更請佢「食檸檬」，搞到羅范好尷尬。
反責記者追訪太貼
由於北角區係建制派傳統票倉，所以無市民狙擊班人大，但接單張嘅多數係公公婆婆，年輕一輩有少少抗拒，就連羅范都話好難搵到後生仔簽名。不過，羅范份人好堅持，最終真係畀佢搵到一家大細簽名支持政改，但正當佢想行前兩步，抱起位幾歲大嘅小朋友時，小朋友即刻耍手又擰頭兼彈開。之後羅范仲怪責記者太近距離追訪佢，嚇親途經市民喎。
唔好以為得羅范食檸檬，資深港區人大代表譚惠珠同樣派政改宣傳單張，點知有位男士接過單張後，即刻撕爛單張，然後即刻走人。譚惠珠對呢個舉動都似乎嚟唔切思考，竟然反常地舉起姆指讚好，唔通珠姐想讚呢位男士勇於表達對政改不滿？