中環出更：張俊勇「掛名」送禮畀母親
聽日就係母親節，又係子女向母親表達愛意嘅時候。卓妮日前喺一個青年組織嘅籌款晚宴上，見到一班城中名人二代，包括「玩具大王」蔡志明兒子蔡加讚、「翡翠皇后」董吳玲玲細仔董必政（Donald）及潮州商會會長張成雄兒子張俊勇（Thomas）等人。講開點樣慶祝母親節，Donald話要同哥哥拍住上，喺屋企煮大餐畀媽媽食。已有兩個女兒嘅Thomas就將送禮物任務交畀囡囡，叫囡囡喺畀嫲嫲嘅禮物上加埋佢個名，就當自己有份送喎！
董必政賀佳節有「煮」意
Donald話自己廚藝了得，皆因佢同哥哥喺外國讀書時經常一齊煮嘢食，一個煮一個洗非常合拍。所以兩兄弟會再合作下廚，煮西餐慶祝母親節。至於煮咩菜式，佢話仲未諗，到時去街市睇吓有咩靚食材再決定，睇嚟佢對自己嘅廚藝好有信心。
卓妮見Donald同家族代理北京同仁堂中成藥嘅黃楚恒、富臨飯店執董邱威廉好好傾，皆因佢哋曾經一齊參加西藏交流團，大家又係福建人，所以零舍同聲同氣。
東華三院總理李曠怡及菁英會成員龔澧都有到場，原來兩人唔止係好友，最近發現佢哋仲係表兄弟，又話遲啲要搞個大型家庭聚會慶祝相認添！
卓妮