政情:郭榮鏗自嘲小時「爛泥」

正所謂「三歲定八十」,一個人有冇領袖風範,可能睇吓細個有冇做過班長就知。但人不可以貌相,貴為「大狀」嘅立法會法律界議員郭榮鏗(Dennis)自爆,雖然係「喇沙仔」出身,但由細到大成績都唔好,又唔識得同老師打交道,成舊爛泥咁。Dennis仲話,咁多年喇沙生涯中未試過做班長。不過佢畢業後去咗外國升學,返港後發展又唔係咁差嘅。

另外,聲大大嘅蔣麗芸(Ann)就真係「三歲定八十」,佢讀小學時做過班長兼風紀總隊長。

蔣麗芸小學已識「獅吼功」

話說試過有次放學時間,有好多同學仔衝閘,情況都幾危險,Ann情急之下施展獅吼功,大叫「停止!」即時嚇窒成班同學仔。當時細細粒嘅Ann仲走入人群,一手抱起面都青晒嘅女同學到醫療室休息。估唔到Ann唔止聲大大,仲好似食咗「大力菜」咁好力。

第一手消息請下載on.cc東網iPhone/iPad/Android/Windows Phone Apps