中環出更：名人談綁架案 唔憂治安變差
轟動全城嘅二千八百萬綁架案引起各方關注，卓妮日前喺沙田馬場見到唔少政商界名人，佢哋都異口同聲話唔擔心香港治安變差，其中香港善德基金會主席董吳玲玲話，香港開埠以來發生嘅綁架案寥寥可數，相信今次係個別事件，強調對於警方處事好有信心。
董吳玲玲透露，bossini（堡獅龍）創辦人羅定邦家族平日做好多慈善相關工作，不時於晚宴上見到其家族成員。佢認為，今次羅定邦孫女羅君兒平安冇事係最重要，亦證明做得善事多係有好報。
家曾遇竊 王庭聰僅失電話
董吳玲玲續指，平日亦有經常教個孫女要靈活變通，唔好亂咁跟陌生人走，仲話個孫都識得點樣應對喎。保良局前主席鄭錦鐘則透露，十多年前同羅君兒及其家人一同去過旅行，知道羅君兒冇事都鬆一口氣。
福建社團聯會副主席王庭聰自爆，家中十幾年前都試過被爆竊，不過好彩佢冇將啲貴重物件擺屋企，所以該名賊人最後只偷到一部電話。佢又話，知道好多住喺獨立屋嘅朋友都試過被爆竊，認為住獨立屋一定要加強保安及安裝閉路電視、養番隻大狗等。
同場仲有公開大學校長黃玉山伉儷，講起嶺南大學學生會早前舉辦音樂會，有表演樂隊唱粗口歌辱罵警察一事，黃玉山封口對此唔作回應，唔知係咪以免被人質疑干涉其他大學校政呢？
卓妮