立法會日前繼續辯論預算案，激進泛民主派「拉布」成癮，廢噏連連，工黨李卓人一於冇你咁好氣，坐在會議廳大覺瞓，被人影到又如何？一於「瞓住先」，嘻！「舒則彌綸覆四海，卷則消液入無形」，夢見自己是天邊一舊雲，都唔知幾鬼過癮！
老朽想起一篇仿《陋室銘》的《樂會銘》，諷刺不少當官的愛開會，原因倒也「合情合理合法」：位不在高，會會有名；會不在大，去了就行。斯是會場，唯吾娛情。台上輪流講，台下隨意聽。談笑有會友，往來無白丁。可以傳雜誌、睹影星。有韻事之入耳，無公務之勞形。微憩養精神，大侃山海經。小子曰：何厭之有！這首《樂會銘》確實也寫活立法會不少議員嘅劣行，除了「微憩養精神」瞓住先嘅李卓人，亦適宜「有韻事」之ＡＶ仁！
講開又講，身為立法會議員，不為民生着緊只為拉布胡混，真係不該！至於議員質素之低劣，開口夾着脷，有時尋且胡言亂語，譬如失當，都唔知好笑定好嬲，好似近日爭拗得「戰火連四月」嘅政改方案，通唔通過，反對派政客除了死牛一邊頸，又強姦民意，說甚麼「袋住先」就是政改盡頭和終點，真不知是哪學來的邏輯推理？
當然，要數笑甩人棚牙的當推梁家傑嘅「悲情」，佢認為「袋住先」——既對不起祖先，也對不起下一代，真係咁大件事？有冇咁嚴重啊？
「袋住先」明明是香港民主邁進一步的里程碑，反對派視民意如草芥，不根據主流民意投票也算了，如今又把祖先抬出來，引喻失義；又拿下一代來製造擋箭牌，譬如失當，真係貽笑大方。政改方案通過怎麼會視作將祖先的精神財富當糟粕丟了？激進派無視現實形勢，自以為是，才是對不起祖先及下一代。