政情：梁安琪井岡山戴紅巾歌舞
澳門賭王何鴻燊四太梁安琪帶隊「衝上」井岡山！江西省僑聯副主席、澳門博彩股份有限公司常務董事梁安琪，日前帶領近百名員工到訪中國「革命聖地」、江西井岡山，參加愛國主義教育活動，期間參觀井岡山小學，校內近千名小學生以內地瘋傳名曲《小蘋果》熱舞歡迎。有跳舞根底嘅四太技癢，戴紅領巾嘅佢走入舞群中，與小學生一同載歌載舞。
梁又戴上革命色彩濃厚嘅紅星軍帽，喺愛國教育開班儀式上表示希望活動可帶動員工加深對中國了解，提升佢哋「愛國愛澳」嘅精神，並期望員工能從中認識中國如何走過紅色革命之路，成為「新中國」，並進身繁榮富強嘅大國行列。此外，梁亦向江西三個華僑農場捐出合共三十萬元人民幣（約港幣三十七萬五千元），以協助農場改善文教衞生設施。