政情：今日你上鏡：陳克勤劏「法拉利」慶生

議員陳克勤今年生日收到嘅禮物，竟然係佢人生第一架「法拉利跑車」，但呢架「跑車」短短十五分鐘就被「劏」車嘞，認真可惜。其實克勤收到嘅只係由同事及助理送贈嘅紅色法拉利跑車造型立體蛋糕。克勤話，同事可能知佢係愛車之人，所以就送呢個蛋糕畀佢，佢除咗大讚同事有心思之外，都忍唔住話架紅色「法拉利」像真度極高，好似着埋燈咁，真係型到爆。