中環出更：財案辯論拉布 李卓人「釣魚」
立法會尋日繼續辯論預算案，由社民連梁國雄（長毛）等激進泛民主派發起嘅「拉布」戰仍然持續，佢哋總共八次要求點算開會法定人數，有兩次響鐘十四分四十幾秒仍然未有足夠嘅議員返回會議廳，搞到差啲流會！除咗不斷要求點算法定人數，激進泛民更同民建聯議員蔣麗芸（Ann）「駁火」。至於冇響應「拉布」嘅工黨李卓人就被發現一度瞓着覺。
阿Ann發言時講到法律援助經常被濫用，仲話佔領行動期間，有人叫一個伯伯或婆婆申請法援，向法庭申請撤銷臨時禁制令，指此舉係拎法庭嚟玩，做法離譜。點知長毛侮辱阿Ann係屎，話香港居民有權對行政部門嘅行為向法院提出訴訟，指法援批出呢類訴訟嘅數量不足三成，批評阿Ann無知得令人大開眼界、嘆為觀止。
阿Ann舌戰泛民 勸飲水思源
人民力量陳偉業就提到東江水係「將屎水畀香港人飲」，阿Ann就立即反駁話「希望大家飲水思源，飲得人哋啲水就要感恩，唔好今日喺度講風涼話」。議員陳家洛更加未有跟大隊同「拉布」劃清界線，反而發言五次，足足講咗一個多小時，唔通佢想成為泛民壞孩子？
卓妮