政情：吳文華寫「天書」 冇教剪布
立法會近年興起拉布，搞到議事效率極低。立法會前秘書長吳文華（Pauline）現時幫緊立法會撰寫一本「議事規則天書」，似乎都對拉布冇咩辦法。尋日Pauline接受立法會議員蔣麗芸（Ann）嘅網上節目訪問時話，外國議會嘅議長，通常有權禁止議員拉布，但香港嘅立法會主席要維持中立，突然剪布會有阻礙。
至於第二個方法就係靠各黨派協調，外國議會常設聯絡小組，畀各黨派進行閉門討論。不過，Pauline話外國議會有執政黨，反對黨為咗將來執政鋪路，所以好少「去到咁盡」，可以透過閉門討論達成共識，或有一定妥協，而香港政黨只需面對選民，無諗過執政，自然唔會讓步同妥協。睇嚟拉布問題都唔可以短期內解決到。
另外，Pauline又講到每個人都有自己嘅強項，佢就發現原來自己煮餸都幾叻，媽咪仲問佢使唔使開番間私房菜添，阿Ann就隨即響應話預訂一圍，唔知幾時會成事呢？