中環出更:史顏景蓮就職 仁愛當家

慈善機構仁愛堂早前舉行新一屆董事局就職典禮,一眾新舊董事局成員聚首一堂,場面熱鬧。今屆新主席史顏景蓮(Kimmy)接替前主席吳明珍成為仁愛堂大當家,仲搵嚟多位老友加入。Kimmy致詞期間,諗起當年佢丈夫史立德做仁愛堂主席時,佢喺背後默默支持,依家到佢接莊就掉返轉獲老公及一眾朋友力撐,一時感觸哽咽,台下嘉賓都受到感染,紛紛拍掌支持。

廠商會多人做新丁總理

今屆新丁總理有十幾個,由於史立德身兼中華廠商聯合會(廠商會)副會長,所以其中唔少係廠商會中人,包括副會長楊志雄、常董沈運龍、名譽會董蔡少森等人,仲有香港盲人體育總會主席孫國華及葵青區撲滅罪行委員會主席楊凱山等人,萬利玩具主席陳明耀就重返仁愛堂做副主席。

「九巴金公主」伍穎梅(Winnie)及男友許晉平亦有到場,講到今次中港股市狂牛,Winnie透露自己嘅投資習慣係放眼中長線,咁係咪好似揀男友咁?佢就甜笑唔答。數數手指,Winnie同許晉平都拍咗幾年拖,唔知有冇計劃結婚?Winnie例牌笑稱就快喇,仲話有好消息一定通知大家喎。

仁愛堂副主席曹貴子就同太太一齊出席,佢今屆亦加入保良局做總理,認真有愛心。雖然曹貴子嘅正職係醫生,不過佢亦係投資達人,佢認為今次牛市係好事,因為之前股市已靜咗一段日子,但投資者切記要量力而為。

卓妮

第一手消息請下載on.cc東網iPhone/iPad/Android/Windows Phone Apps