樓價屢創新高 市民不滿
香港研究協會本月一日至六日，以電話訪問咗一千一百名市民，當中運輸及房屋局局長張炳良嘅評分係眾多司局長中跌幅最大，加上市民對政府紓緩房屋問題評分亦創新低，睇嚟花名「張良」嘅張炳良真係要諗諗「張良計」止一止民望跌勢喇！
受訪者對特區政府五項政策表現，對比兩個月前嘅調查結果全線下跌，以五分為滿分，評分最低係「紓緩房屋問題」，只得二點一一分，比上次大跌零點二三分，分數跌至有調查以來嘅新低。協會相信同樓價屢創新高有關。至於司局長滿意度方面，幾乎全線下跌，當中以張炳良跌幅最大，跌咗零點一九分，協會相信同佢未能有效釋除公眾對機場三跑工程疑慮有關。