政情：阿王大舊血戰立會
立法會早前因為泛民主派「拉布」而積壓大量議程，雖然近期「拉布」有緩和迹象，但亦唔見得議會效率大幅提升。立法會工務小組委員會尋日審議香港紅十字會輸血服務中心總部擴建工程嘅撥款申請，首位「出櫃」嘅立法會議員陳志全（慢必）就要求放寬畀男同志都可以捐血，點知就掀起議員王國興（阿王）同陳偉業（大舊）一場舌戰。血庫長期都話唔夠血，等輸血嘅病人真係多得佢哋唔少。
紅十字會輸血服務中心總部擴建工程撥款申請涉款八億九千三百多萬元，前年立法會捐血日被拒捐血嘅慢必就話，當時紅十字會人員因為佢係男同性戀者，曾有男同性性行為，所以就唔准佢捐血，慢必質疑既然血液需求增加，點解紅十字會仲「有血唔要？」批評紅十字會唔止建築物過時，就連輸血政策都過時咁話。
慢必仲話，美國食品及藥物管理局已預告取消男同性戀者終身禁捐血嘅禁令，澳洲等地亦已取消相關禁令，改為男同性戀者一年冇性行為就可以捐血，認為香港唔應該咁落後。
阿王隨後發言話，尊重慢必爭取同性戀者捐血權，但就希望改變輸血政策時，當局可向立法會交代理由同諮詢市民及接受捐血者，點知就被大舊批評有關言論反映佢潛意識歧視同性戀者，認為阿王唔應該單睇性取向，而唔理事實真相同危險性。阿王就反駁話大舊抹黑佢。
大舊呻食血壓藥無得捐血
大舊又自爆十八歲後一直有捐血，仲曾經一年捐四次，但後來因患上高血壓，要食血壓藥，搞到過去十年唔准捐。佢又問過紅十字會護士，如果停藥兩、三日可唔可以畀佢捐血，但人哋就話答唔到佢，希望可以檢討有關指引。
紅十字會輸血服務中心行政及醫務總監李卓廣就話，有關指引係保障捐血者同受血者嘅安全，又話高血壓人士最緊要係血壓控制得好，唔好突然停藥。雖然大舊聲稱自己血壓唔係好高，但佢成日咁好火，為咗安全起見，建議佢都係唔好為咗捐血而貿貿然停藥喇。
原本講緊輸血服務中心總部擴建工程，但議員就扯到去爭拗紅十字會嘅輸血政策，即使最後通過撥款，啲開會時間就係咁白白浪費。