政情：官辦政改民調港府褪軚
政府預計會喺復活節過後公布政改第二階段諮詢報告，下月再將落實二○一七年特首選舉嘅決議案提交立法會審議。政改三人組曾經講過，唔排除稍後會搞個官辦政改民調，以示大多數港人支持在人大「八三一」框架下嘅政改方案，一方面向泛民主派施壓，另一方面畀藉口泛民「華麗轉身」，支持政改「袋住先」。不過，綜合多方消息，政府已對官辦政改民調打退堂鼓，皆因當局最擔心係開壞先例，今後乜嘢爭議性議題都要搞官辦民調，變成民調治港。
泛民人士咩都反
建議中嘅官辦政改民調有多個版本，政改三人組嘅講法係委託獨立大學機構進行，亦有人建議邀請好似前法官等中立人士監督下做民調。但無論係邊種模式，唔願意接受民調結果嘅泛民人士，都總會搵理由反對同質疑，包括話有關機構過去接過政府唔少民調合約，梗係會偏幫政府；又或者質疑問題有引導性、唔夠客觀、點解唔問另一堆問題等等。總之如果你話圓佢就話方，你話方佢就話圓。
有官員更指，若政府真係整到一個完全中立同無爭議性，同時獲泛民建制各方認同嘅民調機制，咁就仲大鑊！將來不論係新界東北發展、起唔起機場第三條跑道、同性戀者係咪可以結婚、喺唔喺某個地區起公屋或骨灰龕，以至立法會應否廢除功能界別、應否修改《基本法》、香港係咪要獨立等，都會有人要政府利用呢個咁有公信力嘅機制做民調。到時就變咗唔係依憲、依法治港，而係以民調、民粹來治港。
民意支持「袋住先」
其實不論係政府內部定係坊間公開做嘅民調，都顯示支持「袋住先」嘅市民略多於死硬反對，大致係四至五成對三至四成幾咁上下，視乎條問題具體點問，但「袋住先」民意始終谷唔上六成，與個別建制派人士提出嘅七成指標仲有一段距離。況且大部分泛民黨派已表明，即使真係有七成市民支持「袋住先」，佢哋都會繼續逆民意而行反對方案，加上上述考慮，估計呢個官辦政改民調都係會胎死腹中。