唔少立法會議員都計劃喺復活節假期外遊鬆一鬆，身兼行政會議成員同立法會議員嘅林健鋒（Jeffrey）原本都打算去旅行，但就因為搵唔到機位而被迫打消念頭。Jeffrey話，雖然依家啲航空公司已經加開航班，不過因近排推出俗稱「一長兩短」、即一程長途加兩程短途機票嘅優惠，價錢約係市價六折，所以機位仍然好緊張。佢又話，「一長兩短」優惠係好吸引，惟一向事忙嘅佢就唔會心動，事關萬一唔能夠如期出發，到時加埋改機票等費用，分分鐘得不償失，變咗「三長兩短」喎！
