政情：阿王關注家暴 「男士都係弱者」
勞工及福利局局長張建宗（小肥張）尋日於立法會財委會特別會議上，分別被立法會議員王國興（阿王）及黃碧雲「追債」。阿王話男性遭受家暴個案近年有上升趨勢，約達每年七百宗，佔整體數目接近兩成，可見受虐嘅不一定是女性，男士有時都係弱者喎！
被問侍產假 小肥張「耍太極」
阿王續指，男士自殺率一直高，要求加強對男士嘅關注，例如求助熱線會否由男士接聽、設立男士專用庇護所等等。小肥張就話，政府關注家庭暴力不分男女，至於熱線方面就冇需要指定搵男士接聽，因為接線社工都經過專業訓練，而且由女性聽男性訴苦可能更容易溝通。
黃碧雲就追問小肥張有冇檢討侍產假，但小肥張就大「耍太極」，話要平衡勞資雙方嘅利益，又話美國都冇前四後六產假。財委會主席張宇人就出手幫小肥張，話自己兩個女喺美國都要工作到臨生前先入院喎！