中環出更：工記小花挑「基」 不容有蝨
我哋早前報道過工聯會（工記）計劃派出社區幹事陳穎欣（Joephy）擔大旗，挑戰已經當選三屆深水埗麗閣選區嘅民協馮檢基，Joephy更獲民建聯立法會議員蔣麗芸跨黨派「加持」。不過，樣子甜美、今年只係得二十五歲嘅Joephy卻不甘只係做「小花」，連上門幫街坊捉蝨乸嘅工作都唔放過，寧願「蝨王欣」上身都要技術性擊倒馮檢基。
父親係黨副理事長
工聯會上屆區選派出小花劉桂容，成功打敗空降天水圍嘅李卓人，自然食過翻尋味。不過，Joephy來頭唔小，原來佢父親係工聯會副理事長陳志光，自己又勤力讀書，先後取得港大及英國倫敦大學學位，早年亦曾為新民黨主席葉劉淑儀助選。
Joephy話，佢始終喜歡服務基層，加上父親係工聯會自己友，所以佢加入工聯會就親上加親喇。面對高學歷嘅靚女挑戰，唔知馮檢基有冇特別計仔迎戰呢？我哋搵過馮檢基，但佢正身處內地未能回應。
卓妮