鴨脷洲邨野鴿為患房署漠視

「有人朝朝喺度餵鴿，搞到有成百隻（野鴿）聚晒喺度等食，趕都趕唔走！」鴨脷洲邨居民陳伯指出，自去年中開始發現邨內有人每天早上在利福樓附近草叢放置麵包皮，引來大量野鴿聚集覓食。野鴿會在草叢附近休憩處、單位窗簷和水管停留，令四處布滿排泄物，嚴重影響環境衞生，「搞到周圍都係屎，啲鴿又日日企喺屋企窗口，仲試過有雀屎彈入屋，搞到我連窗都唔敢開，成間屋通風都差晒！」

「迷你」捕鴿籠效用低

陳伯擔心野鴿太接近民居會散播禽流感，曾多次向房署投訴，惟房署事隔近半年才「有反應」，可惜仍無助解決問題，「搞咗半年就係擺個捕鴿籠喺度，咁細個籠捉到幾多鴿？點解唔積極啲捉餵鴿嗰個人，啲鴿都係因為有嘢食先會喺度，一日捉唔到人，啲鴿都唔會走！」

放大圖片	陳伯稱指有人於邨內草叢放置麵包皮，引來大批野鴿。	房署放置鴿籠捕鴿，被指未能根治問題。

記者實地視察期間，發現草叢放有大量麵包皮，野鴿紛紛飛至啄食，而只放有一塊麵包的捕鴿籠則明顯「吸引力」不足，沒有野鴿內進。而該邨四周皆見野鴿蹤影，長椅、水管等設施則布滿鳥糞污漬。

邨內多處可見鳥類排泄物，衞生情況惡劣。	街坊點睇 蔡小姐：「周圍都係雀屎，真係好煩，搞到衞生好差！」	呂先生：「好擔心會散播H7N9（禽流感病毒），影響我哋健康！」

房屋署發言人證實，去年一月至今共接獲四宗書面投訴，已在當眼處張貼禁止餵飼野鴿通告，並已因應投訴人發現有人餵飼野鴿的時間加派護衞巡視。並曾於去年底邀請漁農自然護理署派員實地視察環境和提供專業意見，並借用捕鴿籠擺放在野鴿出沒地點。

議員斥消極促「緝兇」

漁護署發言人則說，過去三個月上址三個捕鴿籠共捕獲十七隻野鴿，但強調野鳥因覓食才會於民居聚集，最佳解決野鳥滋擾的方法是中斷食物供應。

「放捕鴿籠根本冇用，裝閉路電視搵出餵鴿嘅人會有效好多！」立法會房屋事務委員會主席麥美娟批評現有做法過於消極，要求當局加強保持屋邨清潔，以免病毒散播，影響居民。

記者：黃凱翎、呂諾君