泛民早前「突襲」全數加入立法會工務小組及人事編制委員會，成功取得兩個委員會嘅主導權，一批建制派議員其後「補鑊」逾期加入，遇上泛民諸多阻撓。
事有湊巧，公民黨議員湯家驊昨要求逾期加入一個附屬法例嘅小組委員會，但委員會入面嘅泛民未見有任何留難。泛民對議員逾期加入委會有冇雙重標準，答案不言而喻啦！
立法會尋日就《競爭條例》附屬法例召開小組委員會，湯家驊要求逾期加入，現場四名議員，包括工業界議員梁君彥（Andrew）、工程界議員盧偉國（WK）、工黨議員何秀蘭及身為湯家驊黨友嘅法律界議員郭榮鏗，都冇人有異議，令湯順利逾期加入委員會。
湯家驊當時解釋，今次逾期加入嘅原因係其助理搞錯咗，而Andrew回應指唔緊要，但語帶雙關話建制派係好歡迎任何人加入，「我哋係人都歡迎，係議員嘅，我諗佢嘅責任都係要加入（委員會）做嘢。」
WK則笑稱要開個小組委員會審議申請，趁機暗批泛民於建制派議員逾時加入工務小組及人事編制委員會嘅拖延做法。