港大民意研究計劃公布行政會議成員最新民意調查顯示，過往評分每況愈下嘅鄭耀棠，今次再「下」一城，排名由上次排第四下降至跌出五大。由於獲得提名最多嘅六位行會成員先可入第二輪評分階段，所以鄭耀棠今次連被評分資格都冇喇！
另一位行會成員葉劉淑儀（葉劉）年初二被神獸麒麟撞飛後，一度曝光率高企，但估唔到對提升民望冇幫助。喺是次調查中，葉劉係最多受訪者提及嘅行會成員，認知率高達九成六。不過多人識唔代表得民心，葉劉嘅評分由四十九點一分跌至四十六點三分，屬不合格水平，亦創下佢出任行會成員以嚟嘅新低，而排名就由第二位跌至第三位。真係唔知佢畀麒麟撞痛啲，定係見到民望下跌心痛啲呢？今次民望調查排名首位仍係林煥光，第二係胡紅玉，第四及五分別為李慧琼及羅范椒芬。