政情:黨友唔想梁耀忠再參選

街工立法會議員梁耀忠(阿忠)成日都話想退下火線,培養黨內新人上位,但一直只聞樓梯響。街工尋日公布三十周年晚宴安排,表明唔會邀請政府官員出席,阿忠仲特登帶晒黨內新人亮相,又畀足機會各人發言,想搵接班人嘅味道甚濃。

新丁拒選立會

阿忠講起搵接班人嘅難處時話,試過搵有識之士入黨,但搵極都搵唔到,所以疊埋心水培養黨內新人,可惜新人多數想專注地區事務,唔想選立法會。雖然佢已六十一歲,但搵唔到人惟有繼續「做住先」,因為街工喺立法會一定要有代表,先至可以保有話語權。

不過,有黨員同阿忠講,如果佢繼續參選下屆立法會,黨友寧願含淚投白票都唔會支持佢,因唔想見到阿忠做極都唔肯走,令街工好似其他政黨咁玩老人政治喎!話時話,街工都成立三十年,連想搵個立法會接班人都咁難,認真有問題囉!

第一手消息請下載on.cc東網iPhone/iPad/Android/Windows Phone Apps