政情：行會廖長城 掌科大校董會
香港科技大學校董會原主席張建東去年九月因病過身後，一直由副主席、全國政協常委唐英年嘅堂弟唐裕年署任，政府尋日終於宣布委任行政會議成員廖長城（Andrew）接任科大校董會主席，任期三年。Andrew本身係資深大律師，除咗專長打知識產權案之外，與科技及大學似乎無乜關係，凸顯現屆行會成員可以出任大學要職嘅人選唔多，揀無可揀。
港府向來喜歡委任行會非官守成員兼任大學校董會主席，主要因行會成員信得過，例如張建東獲委任時本身亦係行會成員，前任嶺南大學校董會主席陳智思亦係行會一員。
之不過現任行會成員中，唔少人都與不同嘅大學有「仇口」或者利益衝突，包括做過教育統籌局局長、出任中文大學校長時以鐵腕同獨裁而聞名嘅李國章；做過教統局常秘、曾被指干預教育學院內部運作嘅羅范椒芬；早前剛獲委任做大學教育資助委員會成員嘅張志剛，亦遭到唔少大專師生質疑。
與學界冇乜牙齒印
Andrew過往做過嘅教育公職雖然唔多，但勝在「身家清白」無乜新仇舊怨，估計呢次任命唔會引起太大爭議同反彈。