中環出更：豪宅做嫁妝 王庭聰：幾貴都買！
新年伊始，政商界就傳出唔少喜訊。去年長女出嫁嘅香港福建社團聯會（聯會）副主席王庭聰，今年底將為細女結婚擺酒宴客。記得當年王庭聰送咗一層大埔豪宅畀大女做嫁妝，仲話幫子女置業係做父母嘅責任，十足十係個好爸爸。咁細女結婚送乜好？王庭聰笑笑口話，「照舊！」佢仲好輕鬆話，樓價升冇所謂，幾貴都瞇埋眼照買喎！
「閩」將如雲 團拜喜氣洋洋
早前聯會舉行羊年新春團拜，閩籍政商界名人齊聚，除咗王庭聰之外，仲有新界社團聯會理事長陳勇、百仁基金副會長楊華勇（Johnny）及消費者委員會主席黃玉山，聯會主席吳良好、榮譽主席林樹哲及永遠名譽會長施子清等人都有到場。王庭聰人逢喜事精神爽，講起嫁女就笑不攏嘴，佢話已經買定層樓畀細女做嫁妝，地點一樣喺大埔。咁呢層樓咪貴咗好多？佢就話，幾個子女一人一間屋，無所謂，實行繼續做好爸爸。
勁食愛心蘿蔔糕 華勇增磅
享受做好爸爸嘅仲有Johnny，佢話今個新年同一對子女留喺香港過，結果增咗磅，事關佢太太莊菲娜首次自製蘿蔔糕，極好味，結果唔覺意食多咗，所以過完年要食得清淡啲至得。身兼公開大學校長嘅黃玉山亦到場同鄉親拜年。佢話做咗消委會主席約兩年，感覺好滿足，因為上至買樓、買車，下至買廁紙，事無大小都同消委會有關，所以要努力做好啲。佢笑稱，自己好少遇到不快嘅消費經驗，因為佢唔多行街買嘢喎！
卓妮