政情：廠商會團拜 以茶代酒
各商會及社團近日接連舉辦新春酒會迎接新一年，尋日中華廠商聯合會就舉辦乙未年春節團拜，會長李秀恒及多名副會長一早到場，除咗輪流發表新年祝賀語句外，又邀請咗廠商會旗下中學生表演用夏威夷結他邊彈邊獻唱傳統賀年歌曲，以充滿年輕活力嘅方式慶祝羊年來臨。一眾會董及成員仲貫徹近年健康飲食風氣，於祝酒儀式時就以茶代酒，話可以順便消消滯。
出席團拜嘅副會長有陳淑玲、吳永嘉、徐炳光、楊志雄、吳宏斌、戴澤良，仲有永遠名譽會長黃友嘉。對於未來一年嘅經濟環境，李秀恒話對一班廠商來講，最艱難嘅時間已經過去，但預計未來幾年勞動力增長會放緩，所以在內地經營的香港廠商仍困難重重。佢又用「務實」形容前日發表嘅財政預算案，認為部分政策有惠及中小企。