中環出更：300「潮人」賀饒老百歲壽
國寶級國學大師饒宗頤百歲生日，城中一眾「潮人」趁尋日潮州商會與潮屬社團總會兩會齊團拜，搞番個神秘生日會。潮州商會會長張成雄帶領三百位「家己冷」高唱生日歌，冧到饒老眉開眼笑。新舊會長濟濟一堂，副會長胡劍江（Michael）、高佩璇、馬鴻銘齊搞驚喜，送上一對金壽桃及木雕壽星公祝壽，全場喜氣「羊羊」。
世交莊學山 學唔到養生
饒老養生有道，秘訣係勤練氣功，高佩璇都拜師門下，佢大爆饒老自創一套盤腿而睡嘅功法，瞓緊覺都可以練功。潮屬社團總會常務副主席莊學山同饒老係世交，兩人相識六十年，莊學山笑言近水流台卻未得月，識咗對方咁耐，竟然乜都學唔到喎。佢話佩服饒老將國學轉化為中華文化，精神值得青年人學習。
張俊勇「中頭獎」 額留紅痕
拜壽行列中，見到會長張成雄嘅公子張俊勇（Thomas）額前有一道兩厘米長嘅紅痕，吸引眾人眼球。原來Thomas過年前「中頭獎」，喺辦公室趕住會見前立法會資訊科技界議員譚偉豪時，不慎撞埋鐵閘。為免留疤痕，搵來整形外科醫生縫針。不過，佢拆線後又匆匆飛米蘭滑雪轉過大運，點知去到雪地冷傷風，部手提電話又凍壞埋，希望羊年否極泰來。
展望羊年香港經濟，從事珠寶及房地產生意嘅Michael寄語港人居安思危，並對內地旅客遭部分港人喝罵感到痛心，呼籲港人將心比己，善待旅客，以和為貴。
卓妮