中環出更:溫馨立會 談談議程吔吔包

坊間經常以「愛情與麵包」來比喻無形嘅愛與實際生活需求嘅抉擇,尋日係情人節兼周末,唔少立法會議員冇得揀,要暫時放低愛情,留喺會議廳內加班開會。佳節當前,議員開會之餘亦不忘諗計慶祝一番。有人請食朱古力、壽司及麵包,有人送情人節書簽,氣氛好熱鬧。不過,人民力量議員「慢必」陳志全獨憔悴,佢自爆已同男友分咗手,今個情人節惟有疊埋心水開會度過。

尋日朝早開完財委會第一節會議後,財委會主席張宇人就買咗多盒麵包及蛋撻嚟慰勞議員,期間「拉布」議員黃毓民笑問會否在麵包落瀉藥,張宇人就回答:「唔使驚,唔會係瀉藥,最多係毒啞你。」

葉劉化身「壽司女郎」

驚大家冇愛情齋飲水會餓親嘅仲有行政會議成員兼立法會議員葉劉淑儀,佢捧住啲壽司周圍派,自稱係「壽司女郎」,仲爆話收到一支女支持者送嘅粉紅色玫瑰花,笑言自己都唔弱喎!

議員林健鋒同莫乃光就大派應節嘅朱古力,當佢哋一見到新婚嘅漁農界議員何俊賢時,就笑佢唔使食朱古力都甜到漏喇!現場除咗有食物,仲有議員梁美芬印製嘅情人節書簽,書簽上印住「讓愛情走到底,讓幸福再走一步!」梁美芬話係喺泛民「拉布」時諗嘅。

慢必爆與男友分手

有人歡喜有人愁,慢必自爆早於佔領行動期間同男友分手,承認「我而家單身喇!」佢冇透露分手原因,只係話同佔領無關。正因為咁,情人節佢就可以專心留喺立法會開會喇!

卓妮

第一手消息請下載on.cc東網iPhone/iPad/Android/Windows Phone Apps