政情：黃進達率「潮」義工探長者

新任潮州商會青委副主任兼康泰旅行社董事總經理黃進達（Jason），近日帶隊成立一隊「家己冷」義工隊，首次探訪西環同黃大仙低收入家庭，期間被長者捉住訴苦，差啲感觸落淚。

義工隊吸引逾百人參加，除青委主任馬鴻銘外，潮州商會會長張成雄、副會長高佩璇等都現身支持，齊齊拎住福袋，走訪有五十年樓齡嘅西環觀龍樓。舊式單位設計唔係順序，而係左兜右兜，Jason話，若無社工帶隊，應該會蕩失路。今次探訪聽到唔少悲情故事，有人呻配偶過身後，只剩孤伶伶一人，認真淒涼。

中學就開始做義工嘅Jason，有唔少體會，佢話探訪時切忌「晒命」、「晒幸福」，例如見到獨居長者，就唔好問人點解一個人住。今次探訪後，Jason話會走訪其他區，希望一年內走勻全港十八區喎。