政情：「民生組織」抄足建制派

我哋早前報道過有年輕網民同專業人士有意參選年底區議會，更擺明搶攻建制派議席；與此同時，學生推動「傘落社區」硬銷真普選就屢被柴台近乎收檔。原來，呢班「有心人」深明硬銷理念唔掂，一於明抄建制派落區，巧立名目成立「慈雲山建設力量」及「天水圍民生關注平台」等社區組織「去政治化」，其中組織「中西街坊」更自製同名區報派街坊。呢啲社區組織如雨後春筍，個個都識開社交網站專頁、派區報、寫揮春，仲派口罩預防流感，總之建制派做咩佢哋都照做。不過，參選唔係細路仔玩泥沙，閒閒哋都要幾年時間深耕都唔保證有收穫，咁遲起步就想贏，實在有啲天真囉！