中環出更：再做開荒牛 阿王話唔怕
工聯會（工記）靠九龍東起家，○八年立法會選舉開始先闖出新界西同香港島，唯獨新界東同九龍西議席多年來一直落空。不過，隨着明年立法會選舉九龍西五席加一席，有傳工聯會轉陣，先派出郭偉強頂替王國興（阿王）出戰港島區，阿王就再轉區空降九龍西插旗，希望為工聯會實現「零的突破」，難得阿王笑言唔怕做選舉開荒牛！
或挑戰九西直選
阿王一二年選舉掹車邊取得港島區最後一張入場券，假如佢明年挑戰九龍西，議員生涯分分鐘玩完。阿王尋日同傳媒茶敍時就話工記四月改選，到時會聽從領導；他又自言生肖屬牛，可能工記想靠佢呢隻開荒牛開拓九龍西喎。係咪去邊區選都無怨無悔？阿王就着我哋問榮譽會長鄭耀棠好過喇。
講起工記，佢哋嘅理事長、有「工記吳啟華」之稱嘅吳秋北一度傳出同郭偉強競逐參選立法會港島區，但隨着郭偉強落戶港島嘅風聲日濃，吳秋北預料會安守本分連任理事長。
卓妮