中環出更：流感當道 李文俊唔得閒病
流感肆虐，除咗做足預防措施及有病記得戴口罩出街外，至緊要做多啲運動。百仁基金主席李文俊（Raymond）及一眾基金骨幹尋日為嚟緊嘅慈善跑活動做宣傳騷，經常喺內地工作嘅Raymond話，佢返港後先知香港流感疫情咁嚴重，尋日上午佢以太平紳士身份巡視九龍醫院，認為大家唔應該輕視。Raymond仲話，佢三個兒子最近都輪流病，佢因為工作太忙而唔得閒病喎！
陳稼晉話會同細仔慈善跑
去年帶埋子女一齊參與慈善跑嘅基金副主席顏志永（Roger）及陳稼晉（Patrick）亦有出席。Patrick話，今年會同細仔一齊參加三公里賽事，佢讚兒子非常好動，上年一支箭咁跑得好快，佢想追都追唔切。見個仔咁有體育細胞，近期佢索性帶個仔去玩BMX小輪單車，一來可以發揮長處，二來等個仔消耗晒精力，返到屋企自然特別乖咁話。
Roger育有兩名仔女，假日一家人會齊齊去踢波，佢唔擔心踢波會令囡囡變得男仔頭，事關個女亦非常鍾意近期勁爆嘅卡通電影女主角，唔止會穿着與主角相似嘅服飾，仲經常買相關玩具。Roger家族經營玩具生意，可惜係以玩具車為主，逃唔過要幫襯人哋買玩具。
「盼青少參與有益身心活動」
講番個慈善跑，預定於三月廿九日舉行。Raymond話，希望活動可以鼓勵青少年多參與有益身心嘅活動，活動籌得善款將全數撥捐基金旗下百仁之友青訓計劃，帶領學生參與行業探索、領袖訓練營等活動。
卓妮