政情：中環出更：晶晶未封肚 啟剛追羊Ｂ？
情人節同農曆新年將至，節日氣氛漸濃，香港青年協會尋日率先大排筵席約二百圍，邀請多名政府高官及香港青年聯會主席霍啟剛等人，同街坊街里預早食團年飯慶祝。對於會唔會追番個羊Ｂ，啟剛代太太郭晶晶表明仲未「封肚」，隨時ready（準備）再追多個喎！佢笑言自細都有兩個細佬陪伴，唔想囝囝中曦孤零零一個成長，但係咪趕得切追番個羊Ｂ就要問過太太意見先得喇。
要追羊Ｂ當然要先冧掂太太，但啟剛坦言今年情人節會「例牌」陪父親霍震霆食飯慶祝，皆因當日係爸爸生日，年年都係咁過，惟有另擇吉日陪太太補數喇。啟剛又透露，中曦已經一歲半，開始上playgroup（遊戲小組），但自己就拒當怪獸家長，只係希望囝囝多啲同其他小朋友相處啫。
哪吒拒絕街坊追求
有份開飯嘅西貢區議員方國珊（哪吒）到場後不忘向街坊派口罩預防流感，佢更自爆最近有人追求，對象係區內街坊添，可惜「襄王有心，『哪吒』無夢」，已經拒絕咗對方好意喇。佢苦笑話，擺太多時間落地區工作，好難抽時間拍拖，但數埋手指都有幾個男士追求o架。不過，哪吒亦開出男友條件，要求對方至少買一萬架手推車畀婆婆買餸，肯出錢出力支持佢嘅地區工作。
另一邊廂，立法會秘書長陳維安（Kenneth）就冇咁得閒，撞正立法會「拉布」戰進入倒數階段，情人節當日更勢加開財務委員會會議審批創新及科技局撥款。
Kenneth坦言，當日可能要駐守立法會，唔敢約太太慶祝，最多叫阿仔幫手煮飯，趕返屋企開餐當慶祝，真係多得泛民主派「帶挈」嘞！
卓妮