政情:沈祖堯自稱藥廠「千古罪人」

憑嶄新嘅胃潰瘍療法而獲各方嘉許嘅中文大學校長沈祖堯,雖然佢嘅研究成果造福病人,但亦令到某啲胃藥嘅銷路大幅下降,令佢成為藥廠盈利減少嘅「千古罪人」。尋日沈祖堯喺貿易發展局一個分享會上,透露當日嘅研究只係打算為人類嘅健康出一分力,可惜導致藥廠股價大幅下挫,實在始料不及。

發表新療法後股價急挫

沈祖堯話,多年前佢接到倫敦一間投資銀行來電,向佢查詢一篇研究報告嘅內容。當時佢大惑不解,自己嗰篇有關幽門螺旋桿菌嘅研究同投資銀行有何關係呢?原來對方收到風,知道佢嘅研究可能會改變胃潰瘍嘅療法,因而令某啲昂貴嘅胃藥乏人問津,所以就向佢求證,以建議客戶減持藥廠股票咁話。結果佢篇研究報告翌日刊出,相關藥廠嘅股價果然應聲下跌。

沈祖堯又話,佢嗰篇研究報告之得以刊出,亦經過一番波折。話說佢原本係向英國一份醫學期刊投稿,可惜被拒絕發表。佢以為自己嘅研究無用,自信受挫之下,惟有將研究報告以海報形式,於一個醫療展中展出,而此舉吸引到一位醫療雜誌主編嘅注目並予以刊登。沈祖堯話,機會會不期而至,大家要好好把握。

第一手消息請下載on.cc東網iPhone/iPad/Android/Windows Phone Apps